ព្រះសីហនុ៖ រដ្ឋបាលខេត្តព្រះសីហនុ នឹងរៀបចំពិព័រណ៍ទេសចរណ៍ វប្បធម៌ និងពាណិជ្ជកម្មរយៈពេល ៥ថ្ងៃ គឺចាប់ពីថ្ងៃទី២៦ ដល់ថ្ងៃទី៣០ ខែមីនា ឆ្នាំ២០២៤ នៅទីលានតេជោ ក្រុងព្រះសីហនុ ដោយមានស្តង់ចំនួន ២៥០ និងស្តង់ VIP ចំនួន ៥៨។ ត្រៀមរៀបចំតាំងពិព័រណ៍ដើម្បីជំរុញកំណើនភ្ញៀវទេសចរ និងលើកកម្ពស់តម្លៃវប្បធម៌ជាតិ។

លោក គួច ចំរើន អភិបាលនៃគណៈអភិបាលខេត្តព្រះសីហនុ បានបញ្ជាក់ឱ្យដឹងថា ក្រៅពីពិព័រណ៍ ក៏មានកម្មវិធីរត់ប្រណាំង ដើម្បីមិត្តភាព និងផ្សព្វផ្សាយលើកកម្ពស់អនាម័យបរិស្ថានក្រោមប្រធានបទ «តំបន់ឆ្នេរគ្មានសំណល់ផ្លាស្ទិក»និង «បរិស្ថានអនាម័យបរិស្ថានឆ្នេរល្អ ទេសចររីករាយ»។

បើតាមលោក គួច ចំរើន ដើម្បីជំរុញឱ្យមានកំណើនភ្ញៀវទេសក្នុងខេត្តព្រះសីហនុតាមរយៈការរៀបចំពិព័រណ៍ទេសចរណ៍នេះ គឺទាមទារឱ្យមានការចូលរួមពីផ្នែកឯកជន និងដៃគូនានា ដើម្បីឱ្យស្របតាមគោលនយោបាយរបស់រាជរដ្ឋាភិបាលអាណត្តិទី៧ក្នុងការជំរុញវិនិយោគិន និងធុរជននៅខេត្តព្រះសីហនុក្នុងឆ្នាំ២០២៤។

លោកអភិបាលបញ្ជាក់ថា ពិព័រណ៍ទេសចរណ៍ដែលត្រៀមរៀបចំនៅចុងខែមីនានេះក៏មានការចូលរួមពីប្រទេសវៀតណាម និងថៃ ផងដែរដើម្បីផ្សព្វផ្សាយជំរុញលំហូរភ្ញៀវទេសចរសម្រាប់ឆ្នាំ២០២៤រវាងតំបន់ឆ្នេរនៃប្រទេសទាំង៣៕